Kandidatët e Albanian ICT Awards XI demonstrojnë përballë jurisë, më 26 Maj zbulohen fituesit

Kur na ndajnë më pak se 2 javë nga finalja e shpalljes së fituesve të edicionit të 11-të të Albanian ICT Awards, juria u mblodh për herë të dytë në Tiranë dhe Prishtinë për të dëgjuar individualisht 50 kandidatë gjatë një procesi maratonë prej 48 orësh.

Organizuar nga ICTSmedia dhe Shoqata ALBICT, ICT Awards mbylli më 30 Prill aplikimet në edicionin e 11-të të garës mbarëkombëtare në teknologji duke pranuar mbi 117 aplikime nga 150 kandidatë.

Tashmë një traditë e jurisë të Albanian ICT Awards, një listë e ngushtë kandidatësh nga Kosova dhe Maqedonia e Veriut prezantoi përballë një trupe ekspertësh të pavarur prej 14 anëtarësh më 12 Maj 2023 në Prishtinë dhe nga Shqipëria më 13 Maj 2023 në Tiranë.

Juria e këtij edicioni përbëhet nga tre komitete të ndryshme vlerësimi sipas kategorive dhe ekspertizës së anëtarëve të saj.

Që nga hapja e vitit të 11-të të ICT Awards më 10 Mars me imazhin dhe identitetin e dhjetërave novatorëve, yjeve në ngritje, sipërmarrësve, hakerëve etikë grave dhe vajzave në teknologji dhe akademikëve, janë organizuar mëse 23 takime në Shqipëri, Kosovë, Maqedoni të Veriut pranë shkollave, universiteteve, qendrave të inovacionit dhe komunave e bashkive Shqiptare në rajon në përpjekje të sensibilizimit të mbarë komunitetin e teknologjisë, inovacionit dhe sipërmarrjes.

Projekte dhe aplikacione Fintech, E-commerce, EdTech, AI / ML dhe Robotikë spikatën gjatë prezantimeve përballë jurisë.

50 kandidatët do të garojnë për gjashtë çmimet e mëdha të ICT Awards: ICT Inovacioni i Vitit, ICT Startupi i Vitit, ICT Diploma e Vitit, ICT Ylli në Ngritje deri në 16-vjeç, ICT Ylli në Ngritje 16-21 vjeç dhe Cyber Security Awards.

18 prej tyre do të shpërblehen me çmimet mbarëkombëtare në teknologji gjatë Mbrëmjes Gala e cila do të mbahet më 26 Maj 2023 për të festuar suksesin, shpërblyer arritjet dhe fuqizuar komunitetin e teknologjisë, sipërmarrjes dhe inovacionit.

Paralelisht me hapjen e aplikimeve, Albanian ICT Awards nisi takimet informuese rreth aplikimeve, kritereve dhe mundësive që ofronte gara.

Fituesit e Albanian ICT Awards kanë përfaqësuar individë, karriera profesionale e të cilëve është shembull kapërcimi sfidash dhe suksesi, përpjekja, vendosmëria dhe kreativiteti i të cilëve ju ka dhënë atyre një njohje prestigjioze në komunitetin shqiptar të teknologjisë në Shqipëri, Kosovë dhe rajon.

Sponsorë dhe partnerë

Edicioni i 11-të i Albanian ICT Awards vjen me mbështetjen e çmuar të sponsorëve Diamond si Raiffeisen Invest, Unioni i Bashkive dhe Komunave Shqiptare, Albvision; Platinium si Dev.al, Vodafone Albania dhe Albsoft; Gold si Soft&Solutions, Digit Sapiens, Baboon, Facilization, Vigan dhe Silver si EasyPay, 3i Solutions, Imbus, Armundia Factory.

Albanian ICT Awards gëzon një partneritet të zgjeruar me Bankën Europiane për Rindërtim dhe Zhvillim nëpërmjet Programit Star Venture financuar nga Enterprise Development Innovation Fund (EDIF) dhe Luksemburgu, AUK, SEEU Tech Park dhe UNICEF Albania.

Kjo ngjarje mbështetet mediatikisht nga Shqip.com, Lexo.al, Telegrafi, PCWorld dhe CIO.